ՕՐԻՆԱԳԾԵՐ / Շրջանառության մեջ գտնվող նախագծեր` "ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆ ՊԵՏԱԿԱՆ ԱՋԱԿՑՈՒԹՅԱՆ ՄԱՍԻՆ" ՀՀ օրենքում փոփոխություններ կատարելու մասին Հոդված 1. "Փոքր և միջին ձեռնարկատիրության պետական աջակցության մասին" ՀՀ օրենքի (5 դեկտեմբերի 2000 թվականի, ՀՕ-121, այսուհետև` օրենք) 2-րդ հոդվածի` ա) 1-ին կետը լրացնել հետևյալ բովանդակությամբ նոր (առաջին) մասով` "Հայաստանի Հանրապետությունում ՓՄՁ սուբյեկտ են համարվում այն առևտրային կազմակերպությունները և անհատ ձեռնարկատերերը, որոնց կողմից մատակարարվող ապրանքների և մատուցվող ծառայությունների իրացման տարեկան շրջանառության ընդհանուր գումարը չի գերազանցում 250 մլն դրամը.". բ) 1-ին կետի "բ" ենթակետը շարադրել հետևյալ խմբագրությամբ. "փոքր` առևտրային կազմակերպություններ և անհատ ձեռնարկատերեր, որոնց աշխատողների միջին ցուցակային թվաքանակը ավել է 5-ից և չի գերազանցում 25 մարդը£". գ) 1-ին կետի "գ" ենթակետը շարադրել հետևյալ խմբագրությամբ. "միջին` առևտրային կազմակերպություններ և անհատ ձեռնարկատերեր, որոնց աշխատողների միջին ցուցակային թվաքանակը ավել է 25-ից և չի գերազանցում 60 մարդը:": դ) ուժը կորցրած ճանաչել 2-րդ կետը: Հոդված 2. Օրենքի 4-րդ հոդվածը շարադրել հետևյալ խմբագրությամբ. "ՓՄՁ-ի պետական աջակցությունը իրականացվում է տարեկան ծրագրով: Տարեկան ծրագիրը մշակվում է ՓՄՁ հեռանկարային զարգացման հնգամյա ռազմավարական ծրագրի հիման վրա: Ռազմավարական և տարեկան ծրագրերը մշակում և հաստատում է Հայաստանի Հանրապետության կառավարությունը, սույն օրենքով սահմանված հիմնական ուղղություններին համապատասխան` ելնելով տվյալ ժամանակահատվածում զարգացման գերակայություններից, ներառյալ` ՓՄՁ ոլորտում նոր աշխատատեղերի ստեղծումը: ՓՄՁ զարգացման տարեկան ծրագիրը իրականացվում է Հայաստանի Հանրապետության կառավարության կողմից սահմանված կարգով: Տարեկան ծրագրի կատարման հաշվետվությունը ներկայացվում է տվյալ տարվա պետական բյուջեի կատարման մասին հաշվետվության հետ:": Հոդված 3. Սույն օրենքն ուժի մեջ է մտնում պաշտոնական հրապարակման հաջորդ օրվանից: Հ Ի Մ Ն Ա Վ Ո Ր ՈՒ Մ "Փոքր և միջին ձեռնարկատիրության պետական աջակցության մասին" ՀՀ օրենքում փոփոխություններ կատարելու մասին ՀՀ օրենքի նախագծի Սույն նախաձեռնության նպատակներից է վերանայել ՓՄՁ դասակարգման չափորոշիչները հնարավորին չափ մոտեցնելով դրանք Եվրամիության չափորոշիչներին և միասնականացնելով տնտեսական գործունեության ոլորտները: Առաջարկվում է նաև սահմանել ՓՄՁ-ների համար տարեկան շրջանառության ընդհանուր գումար, որը գերազանցելու դեպքում տվյալ սուբյեկտը չի համարվում ՓՄՁ և չի կարող օգտվել արտոնություններից: Այդ մոտեցումը ուղղված է նրան, որպեսզի աջակցությունից օգտվի միայն իրականում փոքր և միջին ձեռնարկատիրությունը: Երկրում ՓՄՁ ոլորտի զարգացման հեռանկարը հստակեցնելու նպատակով առաջարկվում է յուրաքանչյուր հինգ տարին մեկ մշակել և հաստատել ՓՄՁ ոլորտի Զարգացման Ռազմավարական ծրագիր, որը կիրականացվի տարեկան Ծրագրերով` ելնելով Ռազմավարական ծրագրում նախանշված նպատակներից և տվյալ ժամանակահատվածում զարգացման գերակայություններից: Օրենքի առաջարկվող փոփոխությունների նախաձեռնողը "Փոքր և միջին բիզնեսի հիմնադրամ" ոչ առևտրային կազմակերպությանն է: